Trajneri i Trepçës’89 akuzon FFK-në: Qëllimi i tyre u arrit

Trepça’89 nga edicioni i ardhshëm do të garojë në Ligën e Parë të Kosovës në futboll.

Mitrovicasit në ndeshjen e barazhit u mposhtën nga Dukagjini pas ekzekutimit të penalltive.

Pas ndeshjes, trajneri i Trepçës’89, Shpëtim Idrizi “shpërtheu” me akuza ndaj FFK-së.

“Ajo që mund të them është se synimi u arrit. Është ditur që nga pranvera që Trepça ’89 dhe Arbëria do të largohen nga Superliga dhe këtë qëllim e arriti kryetari i FFK-së, së bashku me drejtuesit e tjerë të këtij institucioni”, tha Idrizi.

Ekipi i Dukagjinit pati një sezon të mirë, teksa përfundoi në pozitën e dytë, ndërsa ishte në finale të Kupës së Kosovës, ku u mposht nga Llapi.

Në anën tjetër, Trepça’89 i shpëtoi rënies direkte nga Superliga në xhiron e fundit, kurse tash në barazh u mposht dhe në sezonin e ardhshëm do të bëjë gara një rang më poshtë.

(Kosova Sot Online)