Pamje: Shpërthimi emocional dhe plot pasion i Messit gjatë penalltive Argjentinë – Kolumbi

Lionel Messi ishte plot emocione të përziera dhe stresuese gjatë fitores së Argjentinës kundër Kolumbisë në gjysmëfinale të Kupës së Amerikës 2021, që flet shumë për dëshirën e pashterur të 34-vjeçarit për ta arritur lavdinë me ekipin e vet kombëtar. Gjysmëfinalja mes Argjentinës dhe Kolumbisë u desh të përcaktohej me penallti, pasi takimi i rregullt prej 90 minutave nuk dha fitues duke përfunduar baras 1:1.

Lexoni edhe:

Donnarumma shpërthen në lot: Nuk mund ta përshkruaj këtë ndjenjë

Martinez, i cili u përpoq t’i shpërqendrojë kundërshtarët me fjalë, ishte heroi i vërtetë i Argjentinës duke i mbrojtur gjuajtjet e Davinson Sanchez, Yerry Mina dhe Edwin Cardona nga pika e bardhë. Ndërsa Lionel Messi, Leandro Paredes dhe Lautaro Martinez shënuan për Argjentinën, për ta siguruar një vend në finale kundër Brazilit.

Gjatë gjuajtjeve nga pika e bardhë Messi, i cili gjuajti i pari dhe shënoi për Argjentinën, ishte shumë i zëshëm dhe shumë emocional.

Paraqitjet e tij në fushë gjatë këtij turneu dhe reagimet emocionale tregojnë sesa e rëndësishme është për Messin ta fitojë trofeun e parë në karrierë me Argjentinën, që është gjëja e vetme që i mungon atij në një karrierë madhështore dhe të shkëlqyeshme.

Argjentina është në kërkim të trofeut të parë të madh ndërkombëtar që prej vitit 1993, kur e fitoi Kupën e Amerikës, dhe përsëri Messi ishte njeriu i ndeshjes, duke e prodhuar asistin e pestë të turneut, në të cilin i ka shënuar edhe katër gola.

Argjentina i ka shënuar 11 gola deri tani në Kupën e Amerikës 2021 dhe Messi është përfshirë në 10 prej tyre. 34-vjeçari i ka shënuar 4 gola, i ka bërë 5 asiste dhe i ka përgatitur dy golat e tjerë.  

Skuadra e Lionel Scalonit është e pamposhtur në 19 ndeshje, që prej disfatës kundër Brazilit në gjysmëfinalen e Kupës së Amerikës 2019.

 

(Kosova Sot Online )