Lexoni edhe:
“I fejuar me dashurinë e jetës sime” – Arbër Zeneli fejohet për herë të dytë brenda dy vjetësh
Sampdoria e ndal Interin me barazim në një ndeshje argëtuese
Sampdoria e ka ndalur Interin me një barazim dramatik 2:2 të dielën në mesditë, duke ia ndërprerë kampionit në fuqi ecurinë e fitoreve radhazi në fillim të sezonit 2021/22 në Serie A.
Interi e pati dy herë në dorën epërsinë, falë golave nga Federico Dimarco dhe Lautaro Martinez në pjesën e parë në Luigi Ferraris, por Sampdoria ia doli ta barazojë rezultatin në secilin rast përmes Maya Yoshida dhe Tommaso Augello.
Kjo është ndeshja e parë që skuadra e Simone Inzaghit lëshon pikë, pas dy fitoreve në dy ndeshjet e para, në përpjekje për ta mbrojtur titullin në ligë.
Zikaltrit ngrihen në vendin e dytë me 7 pikë pas tri ndeshjeve, dy më pak se lideri, Napoli. Sampdoria, ndërkohë, ka vetëm dy pikë pas tri ndeshjeve dhe ende në kërkim të fitores së parë këtë sezon.
Dimarco e kaloi Interin në epërsi me një gol të jashtëzakonshëm nga gjuajtja e lirë në minutën e 18-të, kur shënoi në cepin e lartë të djathtë të portierit.
Yoshida e barazoi rezultatin për herë të parë për vendasit në minutën e 33-të, kur e mposhti Samir Handanovicin nga afërsia me ndihmën e Edin Dzekos që e devijoi goditjen e tij.
Në çastet e fundit të pjesës së parë, Martinez e ktheu epërsinë e zikaltërve duke e futur topin në rrjetën boshe nga afërsia pas një depërtimi dhe asisti të mrekullueshëm të Nicolo Barellas.
Por Augello e barazoi rezultatin sërish për Sampdorian me mbase golin më të mirë në ndeshje, kur e mposhti Handanovicin me një goditje fantastike me vollei.
Interi i kishte mundësitë e veta në vazhdim, por i mungoi goditja e fundit para portës, derisa rrezikoi edhe humbjen nga disa kundërsulme të rrezikshme të vendasve.
Javën e ardhshme, Interi e pret Bolognën, derisa Sampdoria i shkon Empolit.
(Kosova Sot Online)
