Kroatët të lumtur që nuk iu ra Franca në Botëror
Përzgjedhësi i Kombëtares së Kroacisë, Zlatko Daliq, beson se me skuadrën e tij do ta kalojnë fazën e grupeve në Botërorin “Katari 2022”. Kroatët do të luajnë në grup me Belgjikën, Marokun dhe Kanadanë.
Daliq është i lumtur që skuadra e tij nuk do të takohet me Francën, kampionen aktuale të botës, nga e cila Kroacia kishte humbur në finale e Botërorit “Rusia 2018”.
Trajneri kroat ka deklaruar se synim i Kroacisë nuk është kalimi i grupit, por objektivi është më I madh.
“Jam i kënaqur me shortin. Nuk ka grup të lehtë në Botëror sepse atje marrin pjesë shtetet më të forta të kualifikuara përmes garave. Nëse i shikojmë kundërshtarët, atëherë mendoj se jemi të gatshëm të ballafaqohemi me ta. Sigurisht se do ta kërkojmë kalimin nga faza e grupeve, kjo nuk diskutohet”, ka thënë Daliq.
“Ne nuk do ta nënçmojmë asnjë skuadër. Do të shkojmë ndeshje pas ndeshje për të shkuar sa më lartë. Dëshira ime e vetme ka qenë që t’i shmangemi vetëm Francës, me të cilën kemi luajtur shumë kohëve të fundit”, ka deklaruar Daliq.
Kroacia pati shkëlqyer në Botërorin e fundit duke arritur deri në finale e madhe ku ishte mposhtur nga Franca, 4:2.
(Kosova Sot Online)