Muriqi e ka futur veten në mesin e golashënuesve më të mirë të La Ligas
Vedat Muriqi e ka futur veten në mesin e golashënuesve më të mirë të La Ligas në këtë sezon.
Vetëm Robert Lewandowski (17), Karim Benzema (14) dhe Enes Unal (13), kanë më shumë gola sesa ylli kosovar pas 28 xhirosh të zhvilluara në kampionatin spanjoll.
Por, prizrenasi po hyn dalëngadalë edhe në histori të klubit ishullor, shkruan mediumi spanjoll “Cope”
Natyrisht, “Pirati” do ta ketë të vështirë t’i arrijë 27 golat e Guizas, i cili mbetet golashënuesi më i mirë në histori të klubit.
Por, Muriqi nuk është larg 17 golave të legjendës kamerunase, Samuel Eto’o dhe 18 të Diego Tristan, të cilët kanë lënë gjurmë dhe i zënë pozitat tre dhe katër në histori të klubit sa u përket golave të shënuar brenda një sezon, ndërsa vendin e dytë e mban Enrique Magdaleno me 19 gola sezonalë.
Ish-futbollisti i Fenerbahçes dhe Lazios i ka në dispozicion edhe 10 ndeshje deri në fund të sezonit për t’i arritur të lartpërmendurit.
Së fundmi, përfaqësuesi kosovar i realizoi dy gola në barazimin e Mallorcas 3:3 me Real Valladolidin.
Muriqi i ka shënuar 12 gola në 25 ndeshje sa i ka luajtur në këtë sezon, ndërsa i ka dhuruar edhe dy asistime.
(Kosova Sot Online)
