Delegacioni i FFK-së bën homazhe te varri i legjendës Fadil Vokrri

  • S.A /
  • 09 June 2023 - 14:16
Delegacioni i FFK-së bën homazhe te varri i legjendës Fadil Vokrri

Pesë vjet më parë, Kosova humbi legjendën e futbollit, Fadil Vokrrin. Ish-presidenti i Federatës së Futbollit të Kosovës ndërroi jetë pas një sulmi në zemër, duke tronditur komunitetin e futbollit kosovar, dy vjet pas anëtarësimit në UEFA e FIFA, transmeton Kosova Sot Online".

 Vokrri njihej si një futbollist i shquar dhe lider i përkushtuar. Në pesë vjetorin e ndarjes së tij nga jeta delegacioni  i FFK-së i kryesuar nga Bakir Burri bashkë me përfaqësues të gjeneratës së artë dhe të tifo-grupit “Dardanët” kanë bërë homazhe tek varri i tij, për të nderuar veprën dhe kujtimin për të.

Në 5-vjetorin e ndarjes së tij nga jeta, kujtimet për Fadil Vokrrin mbeten të freskëta, derisa vlerësimi për kontributin e tij çmohet nga të gjithë. Trashëgimia e Vokrrit si futbollist dhe si drejtues i federatës është e vështirë të përshkruhet në fjalë. Ai ishte simbol i talentit dhe pasionit për futbollin dhe me karrierën e tij të bujshme ka lënë gjurmë të thella në historinë e futbollit mbarëkombëtar.

(Kosova Sot Online )