Sauditët ndëshkuan në mënyrë drakonike futbollistët për rebelimin ndaj Mancinit, e pësoi keq edhe bashkëlojtari i Ronaldos
Një skandal i madh tronditi futbollin në Arabinë Saudite pasi u konstatua se pesë futbollistë u rebeluan kundër trajnerit të kombëtares, Roberto Mancini, dhe vendosën të refuzojnë grumbullimin, transmeton "Kosova Sot Online ".
Federata e Futbollit e Arabisë Saudite zbuloi se Nawaf Al-Aqidi, Salman Al-Faraj, Mohamed Maran, Khaled Al-Ghannam dhe Ali Hazazi kishin shkelur rëndë rregullat.
Megjithatë, bashkëlojtari i Cristiano Ronaldos, portieri i Al-Nassr, Al-Aqidi ishte më i ‘keqi’ dhe mori dënimin më të madh.
Al-Aqidi u dënua me pesë muaj pezullim dhe 75 mijë euro gjobë pasi u konstatua se i kishte dërguar mesazhe fyese trajnerit Mancini, duke kërkuar shtyrjen e grumbullimit të ekipit kombëtar.
Ai është ankuar edhe për faktin se është portieri i tretë dhe nuk ka ardhur në takimin e Kombëtares së Arabisë Saudite, ashtu si lojtarët e tjerë të ndëshkuar.
Lojtari i Al-Hilal, Salman Al-Faraj u gjobit me 25,000 euro për refuzimin për të ardhur në kamp, dhe tre lojtarë tjerë të mbetur u pezulluan me nga një muaj dhe u gjobitën me 50,000 euro secili për mungesën pa leje.
Kujtojmë se Arabia Saudite pësoi një dështim në Kupën e Azisë të përfunduar së fundmi, ku u eliminua nga Koreja e Jugut tashmë në fazën e 1/8-tës.
(Kosova Sot Online )
