Edon Zhegrova me shokë do ta sfidojnë Realin

Liga e Kampionëve do të vazhdojë sonte me nëntë ndeshje të tjera të fazës së ligës.

Pa dyshim, vëmendja e natës do të jetë në Francë, ku Lille do të takohet me Real Madridin.

Edon Zhegrova do të mundohet t’i shfaq vlerat e tij për ta marrë ekipin në dorë dhe për t’ju bërë ballë “Mbretërve” nga Madridi.

Ylli kosovar i ka realizuar tre gola në këtë edicion të Championsit, më saktësisht në fazën kualifikuese.

Dhe, 25 vjeçari është i vendosur të tregohet sonte ndaj kampionëve aktualë të Evropës, të cilët madje thuhet se kanë shprehur interesim për të.

Nga ana tjetër, skuadra e Carlo Ancelottit e ka marrë rrugën drejt Francës me qëllim të fitores dhe të tri pikëve të radhës.

Sonte na presin edhe disa ndeshje interesante, kur edhe do të zbresin në fushën e blertë edhe gjigantë të tjerë evropianë.

Bayern Munichu do ta vizitojë Aston Villën në Angli.

Bavarezët shihen si favoritë për ta fituar këtë lojë, por ekipit nga Birminghami nuk i dihet kurrë.

Anglezët, të prirë nga tifozët e tyre të flaktë, do të mundohen ta befasojnë gjigantin gjerman.

Ndërkohë, Liverpooli do t’i bëjë konak Bolognas, për të cilën pjesëmarrja në këtë garë është vetë mrekullia.

“Reds” pa dyshim llogarisin në fitoren e radhës, pas asaj që e kishin regjistruar në Itali ndaj Milanit.

E ekipi tjetër italian, Juventus do t’i shkojë Leipzigut.

“Bianconeri” pa dyshim do të tentojnë të rikthehen në Torino me pikë të plota.

Nga ana tjetër, gjermanët s’kanë çka humbin dhe objektiv i tyre është që t’i mbajnë pikët në shtëpi.

Sonte në fushën e blertë do të zbresë edhe Dinamo Zagrebi i Arbër Hoxhës, i cili do të ketë punë me Monacon.

Dy ndeshje do të nisin në orën 18:45 e shtatë të tjera nga ora 21:00.

(Kosova Sot Online)