Edon Zhegrova po kalon sezonin më të mirë

Edon Zhegrova po kalon sezonin më të mirë të karrierës së tij profesionale, duke tërhequr vëmendjen për paraqitjet e shkëlqyera me Lillen në Francë dhe për formën e tij të jashtëzakonshme në Ligën e Kampionëve. Futbollisti shqiptar ka treguar aftësi të jashtëzakonshme ndaj disa nga gjigantëve europianë, si Real Madrid, Atletico Madrid dhe Juventus, duke e rritur më tej statusin e tij ndërkombëtar, transmeton gazeta “Kosova Sot Online”.

Deri tani në këtë pjesë të sezonit, Zhegrova ka shënuar 7 gola dhe ka dhuruar 2 asistime në të gjitha garat me klubin francez, duke u bërë një element kyç në sukseset e Lilles. Por, përveç numrit të golave dhe asistimeve, Zhegrova është veçuar për driblimet e tij të shkëlqyera, duke e vendosur veten në krye të listave të lojtarëve me më shumë sukses në këtë aspekt në Evropë.

Sipas një matjeje të bërë nga "The Pop Foot", Zhegrova ka arritur të kryejë 58 driblime të suksesshme nga 113 tentime, me një përqindje saktësie prej 51%, duke lënë pas lojtarë të njohur si Lamine Yamal, Rafael Leao, Vinicius Junior dhe Kylian Mbappe.

Lojtari i Lilles do të kthehet në aksion me kombëtaren e Kosovës gjatë ndeshjeve të nëntorit, ku do të përballet më 15 tetor me Rumaninë dhe më 18 tetor do të presë Lituaninë në Prishtinë. Me formën aktuale, Zhegrova pritet të jetë një figurë kyçe për të dyja ekipet, klubin dhe kombëtaren, gjatë pjesës tjetër të sezonit.

(Kosova Sot Online)