Sonte do të zbresin në fushë Reali, Juve e Arsenali

Liga e Kampionëve do ta hapë perden e re sonte me fillimin e edicionit 2025/26.

Faza e Ligës do të sjellë ndeshje interesante edhe në këtë sezon, ndërsa ekipet më të mira do të kalojnë më pas në fazën eliminuese.

Sonte në fushën e blertë do të zbresin gjigantët evropianë, Real Madrid dhe Juventus.

“Los Blancos” do të mundohen ta nisin me këmbë të mbarë me trajnerin e ri, Xabi Alonso, ndërsa do t’i bëjnë konak Marseillet.

Ndërkaq, derbi i natës do të jetë ai mes Juventusit dhe Borussia Dortmundit.

Ekipi i ri i Edon Zhegrovës i hyn i motivuar kësaj loje pas fitores së madhe ndaj Interit në fundjavë.

“Zonja e Vjetër” do të synojë t’i mbajë pikët në shtëpi.

Nga ana tjetër, Verdhezinjtë janë gjithmonë të papërshtatshëm dhe do të shkojnë në Torino për të nxjerrë pikë.

Duel tjetër interesant mund të jetë edhe ai mes Athletic Bilbaos dhe Arsenalit.

“Gunners” sivjet do të jenë edhe më të fuqishëm dhe krahas suksesit në Angli, do ta kërkojnë atë edhe në Evropë.

Andaj, ekipi i Mikel Artetas është i vendosur të kthehet në shtëpi me tri pikë, ndonëse baskët në shtëpi dinë të jenë të rrezikshëm.

Sonte do të luhen gjashtë ndeshje: dy prej tyre do të nisin prej orës 18:45 e katër të tjera prej orës 21:00. 

(Kosova Sot Online)