Kurti: Astrit Deharin e mbytën në qelinë A-3, pa aktakuzë, pa gjykim, pa dënim

  • E.K /
  • 05 nëntor 2020 - 20:23
 Kurti: Astrit Deharin e mbytën në qelinë A-3, pa aktakuzë, pa gjykim, pa dënim

Lideri i VV’së, Albin Kurti,ka kujtuar aktivistin e vdekur të VV’së, Astrit Dehari, në një status të gjatë në Facebook.

Kurti ka thënë se Dehari është mbytur ndërsa ka shtuar se ai nuk ka pasur aktakuzë dhe nuk është gjykuar e as dënuar për mbajtjen e tij 68 ditë në burg.

“Astrit Dehari ishte i paraburgosur, pa aktakuzë, pa gjykim, pa dënim dhe për 68 ditë në burg nuk u mor fare në pyetje. Megjithëkëto, në qelinë A-3 të burgut të Prizrenit, e mbytën. Mbi Astritin është kryer krim prej ditës kur është arrestuar e deri atëherë kur e vranë, këtu e katër vjet më parë. Kryepolici i rajonit të Prizrenit, Nexhmi Krasniqi, i pari pati thënë që Astriti ka vdekur nga doza e tepërt e medikamenteve. Kryeprokurori i Prokurorisë Themelore në Prizren, Sylë Hoxha, pat konstatuar se Astriti është vetëvrarë ende pa u bërë e pa u kryer hetimet.”, ka shkruar ai.

“Por, për 11 lloje të drogave janë zhvilluar teste dhe në asnjërën prej tyre Astriti nuk ka dalur pozitiv. Atë ditë, pra më 5 nëntor 2016, Astriti ngelet mbi katër minuta e gjysmë në qeli pasi që e gjejnë të shtrirë aty. Për katër minuta njeriu vdes katër herë! Raporti i Autopsisë së ekspertëve të mjekësisë ligjore Besim Ymaj dhe Besim Latifaj si dhe Raporti i Institutit Zviceran nga Lozana, përjashtojnë si mundësi vetëvrasjen e Astritit. Nga përcaktimi i lëndimeve si shenja vetëmbrojtjeje, te mungesa e ndihmës së shpejtë adekuate e deri te Naser Makolli, i cili thuhet t’ia ketë dhënë ndihmën e parë Astritit mirëpo u gjet po ashtu i vdekur në burg pesë muaj më vonë, ky rast ka përplot fakte të rënda por edhe të panjohura indikative. Teksa presim që ky krim të ndriçohet, Astriti na ndriçon me jetën dhe punën e tij, kurse sonte, për shpirtin e tij dhe kujtimin tonë, ndezim nga një qiri në dritaret a ballkonet tona.”, përfundoi Kurti.

https://www.facebook.com/albini2017/posts/1003681476798403

(Kosova Sot Online)