Lexoni edhe:
MPJD deklarohet për gjendjen e kosovarëve në Afganistan
Nikaj pas rritjes së rasteve me COVID: E frikshme mungesa e menaxhimit
Bernard Nikaj, anëtari i Kryesisë së Partisë Demokratike të Kosovës ka reaguar pas rritjes së madhe të rasteve të reja të infektimeve me COVID-19 . Nikaj ka thënë se ky rekord rastesh është i frikshëm dhe se mungesa e menaxhimit është e frikshme.
“Rekordi i rasteve me COVID-19 i frikshëm. Edhe më e frikshme mungesa e menaxhimit.I frikshëm, por i pritshëm kur e kemi parasysh se si po menaxhohet pandemia”, ka potencuar ai.
Ai ka shkruar edhe për procesin e vaksinimit nëpër komuna, duke thënë se i njëjti po zhvillohet në kaos për shkak të pritjeve të mëdha dhe mungesës së terminëve.
“Raportimet nëpër shumë Komuna të Kosovës tregojnë se procesi i vaksinimit të popullatës kundër COVID-19 është kaotik, me shumë probleme e pasiguri. Ka mungesë terminesh, ka tollovi në qendra vaksinimi, ka mungesë të fushatës vetëdijësuese për vaksinim, stafi shëndetësor është i rraskapitur nga mungesa e mbështetjes me profesionistë të tjerë dhe nga mungesa e përkrahjes financiare shtesë”, ka shtuar Nikaj tutje.
Reklamë
Zyrtari i PDK’së thotë se e gjithë kjo po ndodh në një kohë kur Kosova është shteti me shkallën më të vogël të vaksinimit.
“E të gjitha këto po ndodhin kur edhe ashtu ka pak qendra vaksinimi e pak të vaksinuar krahasuar me rajonin dhe Evropën, si dhe krahasuar me kërcënimin e madh të rasteve rekord të të prekurve me virus.
Ndonëse i gjithë procesi po shkon ngadalë, e po shoqërohet me probleme të mëdha, për çudi vikendeve ende nuk ka vaksinim. Nuk më ka rastisur të lexojë se një shtet normal ka stopuar vaksinimin e shumëkërkuar për dy ditë të çdo jave.
Krahas këtyre aspekteve të munguara e të pamjaftueshme, masat për mbrojtje nga virusi janë në mjegull të plotë.
Me një menaxhim të tillë, ne po shkojmë drejt një situate kur rastet do të shumëfishohen, dhe ekonomia, edhe ashtu e lënduar, rrezikon të përjetojë edhe një goditje nga një mbyllje e sërishme.
Gjithë këto ditë, teksa po dëgjojmë secilën herë shifra rekorde të rasteve, Ministri i Shëndetësisë nuk është marrë me menaxhim. Ai është marrë më kandidim. Kjo është e papranueshme dhe e pajustifkueshme.
Nuk është koha për kandidim, është koha për menaxhim të pandemisë”, ka përfunduar ai.
(Kosova Sot Online)
