Vjosa Osmani me korrektësinë më të madhe u angazhua për tejkalimin e mospajtimeve

Shkruan: ANALISTI-Idriz Zeqiraj

Edhe pse Serbia u largua nga Kosova “me bisht ndër shalë”, nën breshërinë e bombave të NATO-paktit, ajo nuk e braktisi ëndrrën e ripushtimit të saj. Në pamundësi për ta bërë rikthimin me forcën e armëve, zgjodhi diplomacinë, përmes Akademisë dhe Kishës Ortodokse Serbe. Serbia, përgjatë sundimit tej shekullor, kishte instaluar rrjetin agjenturor të saj në Kosovë dhe në Mërgatë. Logjistika ishte e gatshme. Partinë Komuniste Shqiptare (PKSH) e themeluan jugosllavët, duke e katapultuar në krye të partisë hafijen e tyre Enver Hoxhën, në mbledhjen e organizuar nga kolonët serbë dhe malazezë në Vitomiricë të Pejës.

Lexoni edhe:

Mërgata tepër e dëshpëruar me lojën për mos-themelimin e institucioneve të Kosovës

-Emisarët jugosllavë pranë partisë dhe shtabit ushtarak në Shqipëri, luftën çlirimtare e kthyen në luftë civile. Këtë e konfirmoi edhe historiani kanadez Robert Epstein, në seminarin dyditor të organizuar në Durrës. E vetmja pyetje ishte: “Shqipëria a bëri luftë çlirimtare apo civile?” Rezultoi se Shqipëria proklamoi luftën çlirimtare, por në fakt bëri luftë civile, qytetare. Komunistët shqiptarë, nën instruktimin e kuadrit ruso-jugosllav, avancuan në organizimin ushtarak dhe komunistët e Enver Hoxhës i vrisnin “si derrat e egër” nacionalistët, atdhetarët e organizuar në partitë e “Ballit Kombëtar”, të kryesuar nga djali i Abdyl Frashërit, Mithati, dhe në atë të “Legalitetit”, partia mbretërore.

Enver Hoxhën, me byroistët e tij, e zhytën në krime emisarët jugosllavë, duke vrarë bashkëkombësit e vet, kundërshtarë politikë, me qëllim që ta bënin vasal të tyre. Vrasjet i filluan gjatë luftës, për t’i vazhduar për gjysmë shekulli pas luftës. Mbi 6.000 intelektualë shqiptarë ende janë pa varr në Shqipëri, nga terrori komunist. Realisht, qeveria komuniste, në shumë aspekte, e tejkaloi terrorin fashist.

Lëvizja Popullore e Kosovës (LPK), në Mërgatë, u përça dhe u nda nga “diplomatët” sigurimsa të Enver Hoxhës. Shteti shqiptar mbahej nga prodhimet bujqësore e blegtorale, me tregtinë pothuajse të vetme me Jugosllavinë. Dhe, donte status quo-në dhe denonconte veprimtarinë ilegale të djemve të Kosovës. Shërbimet informative, përkatësisht UDB-a jugosllave dhe Sigurimi shqiptar (SHISH), kanë bashkëpunuar gjithmonë kundër Kosovës, respektivisht për luftimin e nacionalizmit shqiptar. Konkretisht, edhe autori i këtij shkrimi është arrestuar njëkohësisht në Shqipëri, me shokët e ilegales në Kosovë, madje pikërisht në komunikim me shokët në Kosovë. Shkak u bë përgjigjja e një letre, titulluar “Taktika dhe strategjia për realizimin e Republikës së Kosovës”, viti 1973.

Edhe demonstratat e vitit 1981, pastaj protestat vandaliste të mars-prillit 2004, ishin projekt jugosllav, përkatësisht i Serbisë, vetëm me një ndryshim domethënës: të parat ishin kamuflazh dhe mashtrimi ishte i pavetëdijshëm nga rinia kosovare, ndërsa protestat e dyta me radhë u drejtuan nga disa krerë të PAN-it aktual, të vënë në shërbim të Serbisë.

Serbia edhe brenda Aleancës Perëndimore ruan lidhjet me aleatët e vjetër. Shërbimi Informativ Francez angazhoi agjentin e saj të DGSE-së, Arnaud Danjean, dhëndër të Beogradit, i cili u përkujdes për rekrutimin e Hashim Thaçit, përgjatë një kursi të mësimit të gjuhës gjermane në Zyrih të Zvicrës. I shantazhuar me dosje krimesh penalizuese, të përgatitura nga BIA serbe, Thaçi u bë agjent i Francës, i Serbisë, ndërsa hafije i Sigurimit shqiptar ishte bërë më herët. E gjithë kjo është konfirmuar dhe bërë publike në YouTube, nga drejtori i Sigurimit Qendror Francez, Pierre Siramy.

Rrjedhojat kanë qenë dhe mbeten fatale për Kosovën, sepse Hashimi me disa komandantë të tjerë kanë nënshkruar dhe premtuar ndarjen e Kosovës. Dëgjoni lavdërimet dhe arsyetimet e vasalit të tyre, Isa Mustafa, “për trimëritë dhe diplomacinë” e komandantëve kriminelë, të cilët kanë përgjakur dhe shkatërruar Kosovën.

Hashim Thaçi, i ndihmuar nga kuadrot e Nanos dhe Klosit, shkarkoi Kryesinë e vjetër të LPK-së; pushtoi organizatën e LPK-së; grabiti “Fondin Vendlindja Thërret”, të menaxhuar nga Jashar Salihu, duke e kërcënuar me fjalët “ta vras djalin”; mori dhunshëm fletushkën “Zëri i Kosovës” dhe i akuzoi për tradhti të gjithë ata që e kundërshtuan rrugaçërinë armiqësore të tij me shokë.

Pason lista e pasojave të veprimeve kriminale të Hashimit me komandantët e tij, fatale për luftën e djeshme të Kosovës dhe paqen e sotme:

1. Lufta e organizuar, përkatësisht UÇK-ja e LPK-së, u sabotua; u pengua hyrja në luftën e Kosovës. Këtë e konfirmojnë vetë themeluesit e kësaj UÇK-je, duke akuzuar me emër e mbiemër protagonistët sabotues: Hashim Thaçi, Azem Syla, Xhavit Haliti, Kadri Veseli, sipas renditjes bazuar në përgjegjësinë gjatë luftës.

2. Opozita më destruktive, për të mos thënë më kundërkombëtare, është dakorduar që, krahas luftës ndaj Albin Kurtit, njëkohësisht ta sulmojë me shpifje e denigrime edhe Presidenten e artë dhe unike, Vjosa Osmani. Fillimisht, kur bijat veprimtare dhe luftarake të Kosovës, Vjosa Osmani dhe Donika Gërvalla, u përzunë dhunshëm dhe poshtërsisht nga klani i Isa Mustafës, me intrigimin dhe porosinë e Hashim Thaçit, i cili me SHIK-istët e tij e katapultoi Mustafën në krye të LDK-së.

Bërja e ndryshimit politik në Kosovë ishte imperativ, urdhëresë e kohës, sepse krimi vrastar dhe hajnia zyrtare kishin fituar qytetarinë e veprimit. Ish-presidenti i Kosovës, Hashimi, i pranon vrasjet politike edhe pas luftës, kur deklaron publikisht se “krijova Gjykatën Speciale, sepse po vazhdonte vrasja e dëshmitarëve të Hagës, në veçanti në Dukagjin”, duke ia faturuar komandantit të Dukagjinit, të cilin vetë e kishte emëruar, duke shkarkuar një oficer akademik për ta zëvendësuar me një amator civil.

Koalicioni LVV, GUXO dhe ALTERNATIVA funksionoi harmonishëm në votën zgjedhore vetëm në sjelljen e ndryshimit politik në pushtet dhe largimin e komandantëve mujsharë, zullumqarë, vrastarë dhe hajna zyrtarë të PAN-it, por edhe në sjelljen e një frymëmarrjeje ndryshe për popullin e Kosovës, në ecjen e saj demokratike, me ëndrrën fisnike të anëtarësimit në NATO dhe BE.

Kosova krijoi një traditë eprore demokratike zgjedhore në raport me vendet ballkanike. Për të tretën herë me radhë e fitoi garën zgjedhore LVV. Kjo e shqetësoi opozitën, tashmë të bashkuar. Edhe pse e pranuan rezultatin e zgjedhjeve, e kontestojnë pas zgjedhjeve, duke bojkotuar bashkëpunimin në qeverisje me LVV dhe aleatët e saj GUXO dhe ALTERNATIVA. Për shtatë muaj radhazi bllokuan fillimisht Kuvendin, pastaj krijimin e Qeverisë së Kosovës. Ngulmuan në përsëritjen e zgjedhjeve, pavarësisht shpenzimeve dhe dëmeve të tjera.

Presidentja Vjosa Osmani, me korrektësinë më të madhe, u angazhua për tejkalimin e mospajtimeve dhe shmangien e përsëritjes së zgjedhjeve, por opozita, duke u bazuar në shpifjet dhe gënjeshtrat e saj që tashmë i beson edhe vetë, ngulmoi të provohet sërish në votën zgjedhore.

Pas konsultimit me partitë politike, Presidentja mori propozimet datore për ditën e mbajtjes së zgjedhjeve të radhës. Për arsye të ngutisë në krijimin e organeve kuvendore dhe qeveritare, data e lakuar, 21 janar 2026, përjashtohej. Duhej zgjedhur në mes të dy datave të mundshme: 21 dhe 28 dhjetor 2025. Tetë parti preferuan datën 28 dhjetor, pesë parti datën 21 dhjetor, ndërsa tre parti ishin në rregull me cilëndo datë.

Opozita, PAN-istët (PDK-AAK-NISMA), pretendon se data 28 dhjetor është datë kompromisi politik, apo vendim që favorizon një bllok të caktuar partiak, sepse shumica e partive të afërta me LVV-në preferonin pikërisht këtë datë. Kjo demantohet nga palët e vëna nën akuzë, LVV dhe Presidentja.

Shkrimet në këtë rubrikë nuk shprehin qëndrimet e gazetës "Kosova Sot Online".