Zyrtare: Neymari ndëshkohet, pasi i ra shpullë pas qafës kundërshtarit

  • E.K /
  • 17 September 2020 - 09:26
 Zyrtare: Neymari ndëshkohet, pasi i ra shpullë pas qafës kundërshtarit

Sulmuesi i Paris Saint-Germain, Neymar është pezulluar për dy ndeshje, për shkak të kartonit të kuq kundër Marseille. Por autoritetet e futbollit francez janë zotuar se do t’i hetojnë akuzat e bëra nga braziliani për racizëm.

Neymari e akuzoi mbrojtësin e Marseille Gonzalez, për racizëm gjatë takimit tejet të tensionuar të dielën në Ligue 1, i cili u prish nga një përleshje në fushë që për rezultat i kishte 14 kartonë të verdhe dhe pesë të kuq.

PSG-ja humbi 1:0 kundër Marseille, por ndeshja u prish nga skenat e shëmtuara në fund të takimit, pasi pesë futbollistë u përjashtuan me kartonë të kuq për shkak të përfshirjes në një përleshje në fushë.

Neymari ishte i fundit që u përzë nga fusha për shkak se e qëlloi me shpullë pas qafe Gonzalezin.

Gonzalez i ka mohuar akuzat e Neymarit për racizëm.

Edhe katër lojtarët e tjerë që u përjashtuan me të kuq, u pezulluan. Mbrojtësi i PSG-së Layvin Kurzawa u pezullua për 6 ndeshje.

Liga e Futbollit Profesionist (LFP), organi qeverisës i futbollit profesional francez, ka konfirmuar se do t’i hetojë akuzat e Neymarit.

(Kosova Sot Online)