Alba: E di që jam njëri prej futbollistëve më të urryer në botë

  • s. /
  • 26 January 2021 - 10:33
Alba: E di që jam njëri prej futbollistëve më të urryer në botë

Jordi Alba thotë se ndien se është njëri prej lojtarëve më të urryer në botën e futbollit, por këmbëngul se qëndrimi i tij jashtë fushës plotësisht tjetër nga ai në fushë.

Alba ka shkëlqyer për Barcelonën që prej se iu bashkua klubit në vitin 2012 nga Valencia dhe i ka bërë 360 paraqitje deri më sot.

Gjatë kësaj periudhe, ai e ka fituar pesë herë titullin në La Liga dhe një herë trofeun e Ligës së Kampionëve.

Megjithatë, mbrojtësi i majtë spanjoll beson se është lojtar që urrehet nga kundërshtarët e vet për shkak të stilit luftarak.

“Është e qartë se njerëzit që më njohin përmes futbollit, mendojnë se unë jam njëri prej lojtarëve më të urryer në futboll, kjo është e qartë”, tha Alba për Movistar+.

“Është për shkak të mënyrës sesi luaj dhe kjo mënyrë ka bërë që sot unë të jem ky lojtar që jam dhe të jem këtu ku jam”.

Ai shtoi: “Njerëzit e tjerë që më njohin jashtë futbollit e dinë që jam person i përulur i cili e vlerëson çdo gjë në jetë. Lojtari Jordi nuk ka asgjë të bëjë me qenien njerëzore Jordi apo me Jordin me bashkëlojtarët e vet”. 

(Kosova Sot Online )