Kosova mbërrin në Batumi, para ndeshjes me Gjeorgjinë

  • S.A /
  • 01 September 2021 - 15:35
Kosova mbërrin në Batumi, para ndeshjes me Gjeorgjinë

Kosova sapo ka mbërritur në Batumi, ku të enjten do të përballet me Gjeorgjinë në një ndeshje kualifikuese për Kupën e Botës 2022.

Kombëtarja e Kosovës u mblodh të hënën në Prishtinë, ku i nisi përgatitjet për tri ndeshjet e shtatorit me dy stërvitje në Stadiumin Fadil Vokrri, para se të udhëtonte drejt Gjeorgjisë mëngjesin e sotëm. Në Batumi, dardanët do ta zhvillojnë stërvitjen e fundit sot në orën 17:00, para përballjes të enjten, ku do të kenë mundësinë të ambientohen me fushën e stadiumit “Batumi Arena”, i cili do të inaugurohet pikërisht këtë mesjavë.

Me ekipin nuk ka udhëtuar Milot Rashica, ylli i Norwich City i cili nuk u lejua nga klubi i Premierligës për shkak se Gjeorgjia është në listën e Britanisë së Madhe për vendet me rrezikshmëri të lartë të virusit Covid-19.

Ai do të jetë në dispozicion për dy ndeshjet e tjera në Prishtinë, kundër Greqisë dhe Spanjës.

Kosova është ende në kërkim të fitores së parë në një ndeshje kualifikuese për Kupën e Botës në historinë e saj.

Kjo është hera e dytë që kombëtarja verdhekaltër merr pjesë në kualifikimet e Botërorit dhe ato i nisi keq përsëri, pasi i humbi të dy ndeshjet e para në Grupin B, kundër Spanjës dhe ndaj Suedisë.

Pas përballjes me Gjeorgjinë më 2 shtator në udhëtim, verdhekaltrit do të rikthen në Prishtinë për dy ndeshjet e vështira ndaj Greqisë më 5 shtator dhe ndaj Spanjës më 8 shtator.

Grupit i prin Spanja me 7 pikë, e ndjekur nga Suedia me 6, derisa Kosova ngel e fundit pa pikë.

(Kosova Sot Online )