Shtrihet në spital kampionia olimpike, pas infektimit me Covid

  • E.K /
  • 20 shtator 2021 - 19:28
 Shtrihet në spital kampionia olimpike, pas infektimit me Covid

Kampionia Olimpike nga Tokio 2020, Madi Wilson është shtruar në spital pas infektimit me COVID-19.

Notarja australiane e fitoi medaljen e artë në Lojërat Olimpike të Tokios në kategorinë 4×100 metra stil të lirë.

Më pak se dy muaj pasi triumfoi në Olimpiadë, Wilson rezultoi pozitiv me koronavirus, derisa ishte në Itali për eventin  International Swim League.

“Jam e zhgënjyer totalisht dhe e mërzitur që nuk mund të garoj bashkë me ekipin këtu. Së fundmi rezultova pozitiv me Covid dhe dje u shtriva në spital për ekzaminime të mëtejme. Edhe pse jam e vaksinuar me dy dozat, u infektova nga ky virus”, shkroi ajo në Instagram.

E arta e Wilson në Tokio 2020 ishte e dyta për të në përgjithësi, pasi e mori të parën në Olimpiadën e Rio 2016. Ajo gjithashtu fitoi të bronztën në stafetën e 4x200m në Tokio.

(Kosova Sot Online)