Zvicra me Shaqirin e Xhakën po ushtron në Spanjë, po bëhet gati për lojën me Kosovën

Futbollistët kosovarë janë bërë pjesë e “Helvetikëve” në grumbullimin e Marbellas. Shaqiri e bëri udhëtimin më të gjatë në karrierë, kurse Xhaka nuk ushtroi në ditën e parë pasi ishte i sëmurë.

Kombëtarja e Zvicrës është grumbulluar për ndeshjet e këtij muaji me Anglinë dhe me Kosovën.

Xherdan Shaqiri dhe Granit Xhaka i janë bashkuar ekipit “Helvetik” në përgatitjet që po i zhvillon në Marbella.

Shaqiri madje e ka bërë udhëtimin më të gjatë në karrierë, nga Chicago në Spanjë për ndeshjen me Kosovën.

Ai iu bashkua mbrëmë skuadrës së drejtuar nga selektori Murat Yakin.

Lexoni edhe:

Trajneri serb: Loja me Kosovën më la pa punë, në Mal të Zi më shikuan si tradhtar e në Serbi si hero

Ndërsa, Xhaka nuk ka ushtruar në ditën e parë pasi ishte i sëmurë, e i është bashkuar ekipit sot.

Trajneri Yakin, miqësoret e marsit i konsideron si të rëndësishme për t’u përgatitur për Ligën e Kombeve, e cila fillon pas pak muajsh.

Ai e sheh lojën me Kosovën si speciale, pasi do të ketë përballje në mes shqiptarësh.

Zvicra do ta zhvillojë miqësoren e parë më 26 mars në “Wembley” të Londrës kundër Anglisë.

E tri ditë më pas e pret Kosovën në Zurich.

Krahas Shaqirit e Xhakës, te Zvicra është ftuar edhe futbollisti tjetër kosovar, Andi Zeqiri.

(Kosova Sot Online )