Zbulohen datat e reja kur Kosova do të rikthehet prapë në fushën e blertë

Kombëtarja e Kosovës e pati një orar të ngjeshur në muajin qershor duke i zhvilluar katër ndeshje të Ligës së Kombeve vetëm në pjesën e parë të muajit. Maratonën e qershorit Kosova e nisi më 2 qershor me ndeshjen që e fitoi ndaj Qipros në udhëtim, 2:0. Më pas, “Dardanët” luajtën me Greqinë më datën 5 në stadiumin “Fadil Vokrri” duke humbur 0:1. Më 9 qershor, ekipi i Alain Giresse u këndell dhe e mundi Irlandën e Veriut me rezultat 3:2, po ashtu në kryeqytetin kosovar. Ndërkaq, lojën e fundit të këtij muaji Verdhekaltrit e zhvilluan mbrëmë në Volos të Greqisë, ku u mundën, 0:2. E Kosova do t’i luajë edhe dy ndeshje në kuadër të Grupit 2 të Ligës C.

Lexoni edhe:

Vjedhja e 2.1 milionë eurove, sot mbahet seanca

Vedat Muriqi me shokë do të rikthehen në fushën e blertë në fund të muajit shtator. Ata do ta vizitojnë Irlandën e Veriut më datën 24 të atij muaji. Kurse, kampanjën e këtij edicioni në Ligën e Kombeve do ta mbyllin më 27 shtator, kur do ta presin Qipron në shtëpi. Aktualisht, Kosova është e dyta në grup me 6 pikë nga 4 ndeshje, prej tyre 2 fitore e 2 humbje. 

(Kosova Sot Online )