Lexoni edhe:
KFOR konfirmon: Letrën e Serbisë e kemi pranuar
Spalletti është një nga trajnerët më të mirë
Francesco Totti pranon se do të donte të fliste sërish me Luciano Spallettin dhe është i sigurt se një ditë do ta bëjnë këtë. Ish-kapiteni i Romës kishte qenë shumë i sinkronizuar me trajnerin italian gjatë periudhës së parë në stol nga viti 2005 deri më 2009, por gjërat ndryshuan kur Spalletti u kthye nga janari 2016 deri në maj 2017, transmeton "Kosova Sot Online".
Ai e la gjithnjë e më shumë Tottin në bankën e rezervistëve dhe u fajësua hapur nga tifozët – dhe deri në një farë mase nga gruaja e Tottit, Ilary Blasi – për “detyrimin” e vendimit për t’u pensionuar.
Kjo është arsyeja pse Totti ndjeu një ndjenjë të tillë hakmarrjeje në prill të vitit 2016, kur hyri si zëvendësues në minutën e 86-të në ndeshjen ndaj Torinos. Roma ishte duke humbur 2:1 në shtëpi, teksa ish-sulmuesi italian shënoi shpejt dy gola dhe romakët fituan në fund 3:2. Totti tha se ky moment për të është si i treti më i miri në karrierën e tij. “E vendosa atë moment pas fitimit së Scudettos dhe Kupës së Botës me Italinë”, tha ai për kanalin “BepiTV” në “Twitch”.
“Në atë kohë ndihesha i përjashtuar nga gjithçka. Nuk kam dalë kurrë kundër trajnerit në karrierën time, por ajo periudhë ishte e çuditshme. Ajo ditë ishte e paharrueshme për mua. As që mund ta përshkruaj”, shtoi 46-vjeçari. Në vitin 2017 Totti zgjodhi të pensionohej në vend që të luante për një klub tjetër përveç Romës së tij të dashur, ku ai kaloi gjithë karrierën e tij si lojtar. Ai nuk ndihej ende gati për të varur këpucët, por u shty gjithnjë e më shumë nga trajneri Luciano Spalletti, teksa atij nuk iu ofrua as mundësia për të rinovuar kontratën – diçka që tifozët nuk ia kanë falur kurrë trajnerit të tanishëm të Napolit. “Do të doja të flisja me Spallettin dhe jam i sigurt se një ditë do të ndodhë. Unë dhashë maksimumin me të. Më ka ndryshuar rol, kam pasur raporte të shkëlqyera me të, gjynah që kam përfunduar kështu. Ai është ende një nga trajnerët më të mirë përreth. Askush nuk e përcakton një ekip ashtu siç e bën ai”, tha Totti.
(Kosova Sot Online )
