Intervistë me këngëtaren Sala Bekteshi

Ka vite në skenë dhe me shumë pasion vazhdon të këndojë muzikën popullore shqipe. Fjala është për këngëtaren e njohur Sala Bekteshi e cila në një intervistë për "Kosova Sot", ka shpalosur të pathëna rreth jetës dhe karrierës.

Disa nga këngët e saja më të njohura janë: "Mirë se erdhe", "Mërgimtarë", "Lotët", "Mos trazo detin", "Pa emër dashuri", "Do të ishte mrekulli", e shumë të tjera.

Lexoni edhe:

Meti Bërbatovci: Sot për sot në skenë nëse nuk bën provokime dhe skandale nuk të njeh askush

“Kosova Sot Online”: Së fundmi keni publikuar dy duete "Ku lind dashunia" dhe "N'hije t'isit", sa jeni ndarë e kënaqur me bashkëpunimet?

Sala Bekteshi: Po, së fundmi janë publikuar dy këngë në duet me kolegët e mi të çmuar Shaqir Cervadiku dhe Rifat Berisha dhe jam ndarë shumë e kënaqur. Mund të them që janë pëlqyer shumë kam marr shumë komente të mira. Të këndosh me Shaqirin dhe Rifatin vërtetë është një privilegj.

“Kosova Sot Online”: Ndër vite, keni realizuar disa këngë, por cilat mbetën këngët më të dashura për ty që më ëndje i këndon?

Sala Bekteshi: Të gjitha këngët që i kam kënduar i kam kënduar me ëndje dhe mundohem çdo herë me i zgjedh temat dhe me ja dhanë hakun këngës por i kisha veçuar këngët “Ditëlindja” dhe këngën për "Riza Bllacën”.

“Kosova Sot Online”: Thuhet se vitet e fëmijërisë janë më të ëmblat, na kujtoni ndonjë ngjarje, për të cilën edhe sot ke nostalgji nga vendlindja?

Sala Bekteshi: Vërtetë vitet e fëmijërisë janë vitet më të mira, i kujtojë me plotë nostalgji prezantimet e mija të para kur këndova para bashkëfshatarëve të mijë në Bllacë për festën e 28 Nëntorit dhe ditën e shkollës, isha vetem 11 vjeçe kur këndova për herë të parë, ishte një ndjenjë dhe një emocion i veçantë.

“Kosova Sot Online”: Tash e sa vite jetoni në kurbet, sa është e organizuar diaspora në vendin ku jetoni?

Sala Bekteshi: Po u bën më shumë se 10 vite që jetoj në kurbet në Gjermani dhe aspak e lehtë për mua larg vendlindjes sa i përket organizimit mendoj që po janë të organizuar mirë.

“Kosova Sot Online”: A jeni vaksinuar kundër Covid-19 dhe a besoni se viti 2022 do jetë fundi i pandemisë COVID-19 dhe varianteve të saj?

Sala Bekteshi: Kjo kohë e pandemisë të them të drejtën ishte shumë e vështirë për të gjithë, po dashtë Zoti e i vjen fundi sa më shpejt!

“Kosova Sot Online”: Sipas teje, a është e nevojshme që një këngëtar/e të provokojë në skenë, apo nuk mund të kuptohet një këngëtar/e, i/e pëlqyer sot pa provokime?

Sala Bekteshi: Unë mendoj që provokimet në skenë s'janë aspak të nevojshme, dalja në skenë është një përgjegjësi e madhe, duhet të kemi kujdes se çfarë prezantojmë para shikuesit e dëgjuesit!

“Kosova Sot Online”: Me cilin këngëtar/e nga estarda do të preferoje ta realizoje një bashkëpunim?

Sala Bekteshi: Gjatë karrierës time kam pasur shumë bashkëpunime me shumë kolegë e kolege, besoj që do ketë prapë në të ardhmen edhe tjera bashkëpunime por s'po përmendi emra, ja lëmë kohës!

“Kosova Sot Online”: Sipas jush, ku është muzika shqipe sot, a jeni e kënaqur me standartin aktual, apo duhet ndryshime urgjente?

Sala Bekteshi: Muzika shqipe me thanë të drejtën pakë ka muzikë shqipe dhe s'mund të them që jam e kënaqur por unë mendoj që fajin kryesor e kanë mediat, ju japin hapësirë më shumë antivlerave sesa vlerave!

“Kosova Sot Online”: Cila është motoja që Sala përdor më shpesh si mesazh për shoqërinë dhe jetën në përgjithësi?

Sala Bekteshi: Motoja ime është dhe mbetët: Të jemi më të dashur për njëri- tjetrin, të duam më shumë!

Intervistoi: Armend Preteni

(Kosova Sot Online)