Kosovës i nevojitet më shumë se kurrë një President i zgjedhur me votë demokratike, jo me pazare të pista dhe katapultime politike

Shkruan: Gani Qarri

Përvoja e hidhur e deritanishme me katapultimet e personave të papërshtatshëm dhe të rrezikshëm për vendin në postin e të parit të shtetit, siç u veprua kohë më parë me kuislingun Hashim Thaçi, i cili për shkak të interesave personale e qoi vendin buzë ndarjes dhe shuarjes totale të shtetësisë së Kosovës, sidomos në momentet nëpër të cilat aktualisht po kalon Kosova, e bënë të patejkalueshme nevojën, që të mos u lihet më vend manipulimeve të figurave të degjeneruara dhe kalkulimeve të partive politike, por të bëhet zgjedhja e drejtpërdrejt e presidentit me vullnetin e qytetarëve dhe votën e lirë të vet popullit.

-Duke pasur parasysh faktin se deri më tani, që nga paslufta e këndej, nuk është marrë pothuajse asnjëherë në konsideratë vullneti i qytetarëve, është manipuluar me votat e tyre dhe nuk është informuar kurrë për kalkulimet që bënin partitë politike, është koha e fundit që për të rikthyer besimin në popull, tejkaluar situatat e krijuara nga kriza ekonomike, politike dhe sociale në vend, zgjidhja e presidentit, doemos të bëhet në mënyrë të drejtpërdrejtë dhe me votën e lirë të popullit të këtij vendi.

Lexoni edhe:

Hajnat në pushtet, që po e vjedhin shtetin, të ndëshkohen dhe përjashtohen përjetësisht nga politika

Madje, në mënyrë që kjo të respektohet dhe të mos mbetet më vetëm retorik mediatike, duhet të formohet urgjentisht një komision shtetëror për ndryshimet e nevojshme kushtetuese përfshi edhe plotësimin e ligjeve për ndryshimin e sistemit qeverisës nga ai parlamentar, siç ishte deri më tani, në gjysmë presidencial apo sistem plotësisht presidencial, njëjtë siç është edhe në fuqinë më të madhe demokratike të botës, Shtetet e Bashkuara të Amerikës, ku edhe besimi i popullit do të ishte më i madh në personalitetin e zgjedhur drejtpërsëdrejti me votën e lirë të qytetarëve, për president të vendit.

Përndryshe do të bëhej serish edhe një gabim tjetër fatal i gjithë spektrit politik në Kosovë, nëse lejohet përsëritja e të njëjtës gafë sikurse vepruan me kandidaturën e Hashim Thaçit që me vota të imponuara nga jugonostalgjiku dhe bashkëpunëtori i Rrahman Morinës, Isa Mustafa, e bënë (përdhunshëm) President, pavarësisht faktit që ishte e pritshme se pas formimit të Gjykatës Speciale, ai si emër i parë në listën e Dick Marty-it, gjithsesi do të ballafaqohej shpejt me drejtësinë, mbi bazën e raportit të të cilit u ngritën edhe aktakuzat për gjithë ish komandantë e UÇK-së dhe drejtuesit e Shtabit të Përgjithshëm.

Sidomos zhvillimet më të reja aktuale, që kanë ndodhur së fundi në Kosovë shtrojnë nevojën e domosdoshme të zgjedhjes së një figure të pastër intelektuale për president, drejtpërsëdrejti nga vet populli i Kosovës, pa u lënë më vend manipulimeve të mafio-oligarkistëve dhe kalkulimit të figurave të degjeneruara politike në vend. Madje për ti vënë nën kontroll, personat dhe partitë e inkriminuara tash e mbi 12-13 vite, presidentit të zgjedhur me votën e drejtpërdrejtë të popullit, duhet ti rriten e zgjerohen edhe kompetencat , në mënyrë që personat e korruptuar dhe segmentet e kriminalizuara të mos guxojnë më të kooketojnë me nëntokën dhe krimin e organizuar në vend, siç kanë vepruar lirshëm dhe pa fije droje, deri më tani.

Lexoni edhe:

Buxheti i shtetit dhe djersa e taksapaguesve po vidhet deri në palcë nga të gjitha anët

Edhe paraqitja e kandidaturës për president të Kosovës, nga kreu i AAK-së Ramush Haradinaj dhe insistimi i tij që ai tani, të mbështetet me çdo kusht, përkundër faktit se edhe Haradinaj, njësoj sikurse Hashim Thaçi dhe të dyshuarit e tjerë, jo vetëm që është intervistuar, por edhe mund të arrestohet nga Prokuroria Speciale për krime të luftës, i cili për këtë arsye edhe kishte dhënë dorëheqje nga pozita e kryeministrit të vendit, është vërtet jo serioze dhe pa asnjë garancë për qëndrueshmëri, ndaj është koha e fundit që të bëhen urgjentisht ndryshimet e nevojshme kushtetuese dhe presidenti të zgjidhet jo sipas dëshirës dhe kushtëzimeve ndërpartiake, por me votën e drejtpërdrejtë dhe vullnetin e lirë të qytetarëve, njëjtë siç u zgjodh edhe Joe Biden në SHBA.

Shkrimet në këtë rubrikë nuk shprehin qëndrimet e gazetës "Kosova Sot Online".