Drejtësia duhet të pastrohet urgjentisht, në Prokurorinë Speciale të Kosovës ka vartës të kastës së inkriminuar politike, njerëz me të kaluar të kriminalizuar

Shkruan: ANALISTI - Dardan Grapci

Pavarësisht deklaratave politike pompoze se do luftohet krimi e korrupsioni, kjo gjë deri më tani nuk ka ndodhur. Ato deklarata të krerëve shtetëror kanë mbetur shterpe. Qytetari i Kosovës është lodhur me deklarata të tilla. Këtë më së miri po e dëshmon edhe ky rasti i fundit i procesit gjyqësor lidhur me të ashtuquajturën “Afera e Hidrocentraleve, dosje e cila ngarkonte për korrupsion figura qendrore të shtetit që ishin të lidhur ngushtë me majën e pushtetit, pra deri në nivel të ministrave. Kjo gjë nuk ka ndodhur dhe nuk pritet të ndodh, përderisa në krye të gjyqësorit të gjenden vetë ata të cilët drejtësinë e kanë sjellë këtë gjendje mjerimi, në një sistem drejtësie i cili tërësisht vazhdon të jetë i kontrolluar dhe nënshtruar nga krimi.

-Përderisa në Prokurorinë Speciale të Kosovës ka vartës të kastës së inkriminuar politike, njerëz me të kaluar të kriminalizuar, nuk mund të pritet që të njëjtit t’i dënojnë vartësit e tyre apo pjesëtarët e rrjetit të tyre. Nuk them se të gjithë që punojnë aty janë të tillë, por lëndët e hetimeve që prekin individët e këtij rrjeti kalojnë jo rastësisht nëpër duar të zyrtarëve të kapur, të cilët kanë ardhur në ato pozita nga vet kjo kastë e kriminalizuar. Shpresa e vetme e pastrimit dhe fuqizimit të sistemit të drejtësisë, duke e drejtuar atë prokurorët që kanë integritet dhe gjyqtarët profesionistë që e zbatojnë ligjin pa dallim, është pritja për miratimin dhe fillimin e zbatimit të ligjit VETTING.

Lexoni edhe:

Kosova ti kthehet kultivimit zhvillimit të identitetit të vetë paqësor!

Prokurorët tanë të cilët janë të thirrur për të hetuar shkelësit e ligjit, paguhen me paga të majme nga buxheti i Kosovës. Përderisa paguhen në mënyrë meritore, ata po abuzojnë me besimin e dhënë dhe obligimin që e kanë marr sepse nuk po e bëjnë si duhet punën e tyre. A i kanë borxh dyfish shtetit dhe qytetarit. Edhe për pagën që marrin, edhe për mos ndëshkimin e atyre që abuzojnë me pasuritë e shtetit dhe me paranë publike, pronë e të cilës është vet qytetari i Kosovës, ata duhet të ndëshkohen me shkarkim, por kjo nuk do të mundë të ndodhë pa e futur VETTING-un në zbatim. Vetëm atëherë mund të presim drejtësi plotësisht të pa varur dhe profesionale, dënime dhe gjykime të drejta për secilin që shkel dhe abuzon me ligjin.

Një drejtësi e drejtë dhe efektive disiplinon secilin zyrtar të mos shkel ligjin dhe nuk e amniston krimin. Praktikat e e deritashme të aferave të mëdha, sikur “Afera e Hidrocentraleve” po tregojnë se kur janë në pyetje njerëzit e korruptuar që kanë ndikim politik dhe klanor, tani për tani as që vjen në konsideratë hetimi dhe gjykimi i tyre. Kjo po ndodh për faktin se truri drejtues i institucioneve të drejtësisë udhëhiqet nga njerëzit e dërguar pikërisht prej kastës aktuale politike. E njëjta gjendje është edhe në Prokurorinë Speciale – kompetente me ligj për luftimin e korrupsionit dhe krimit të organizuar. Pra të gjitha këto niveleve të sistemit të drejtësisë duhet pastruar nga lidhja e tyre dhe bashkëjetesa me krimin e organizuar.

Shkrimet në këtë rubrikë nuk shprehin qëndrimet e gazetës "Kosova Sot Online".