Përfundimi i zgjedhjeve në BE e rikthen dinamikën e re për finalen e dialogut mes Kosovës dhe Serbisë

Shkruan: ANALISTI-Gani Qarri

Pas përfundimit të zgjedhjeve, BE është duke provuar ti rikthehet dinamizimit të dialogut të bllokuar ndërmjet Kosovës dhe Serbisë, pasi që edhe Serbia tani më e ka përmbyllur këtë proces, me qëllim të shënimit të ndonjë hapi sado simbolik me lidershipin e ri të dalë nga zgjedhjet e fundit të BE-së. Ndërsa për ta qartësuar rrugën e zbatimit të marrëveshjes së Brukselit dhe Aneksmarrëveshjes së Ohrit, Kosova dhe Serbia detyrohen që deri më 18 korrik t’i dërgojnë komentet e tyre në Bruksel, dhe të deklarohen se si e shohin vazhdimin e këtij procesi, që ka për synim zhbllokimin e zbatimit të marrëveshjes.

- Duke qenë se të dy takimet e fundit në Bruksel ndërmjet udhëheqësve të Kosovës dhe Serbisë edhe në nivel kryenegociatorësh përfunduan pa ndonjë rezultat, komentet u janë kërkuar të dyja palëve. Dhe Bashkimi Evropian i pret tani komentet e Kosovës dhe të Serbisë, për të hartuar një propozim të ri mbi këtë proces i cili me Lajçakun e Borellin ka hy në rrugë pa krye dhe vazhdon të mbetet i bllokuar.

Lexoni edhe:

Kosovës i duhet sot më shumë se kurrë uniteti politik për interesin nacional dhe strategjik

Por duke pasur parasysh qëndrimet ekstremiste të Serbisë, megjithatë, nuk mundë të jetë donjë pritje optimiste, as për propozimin e ri që mundë ta bëjë BE në bazë të komenteve të palëve në dialog. Kështu që edhe nuk priten të ndodhin ndryshime të mëdha madje është shumë e mundshme që derisa Lajçak të qëndrojë në pozitën e ndërmjetsuesit, të vazhdojë edhe më tej statuskuoja, kur dihet se edhe në verën e vitit të kaluar kishte diskutime, për planin e sekuencimit, të cilat duke pasur parasysh qëndrimin e hapur pro-serb të ndërmjetësit Lajçak, deri më tani nuk prodhuan asnjë rezultat në zbatimin e marrëveshjes.

Shkrimet në këtë rubrikë nuk shprehin qëndrimet e gazetës "Kosova Sot Online".