Kurti duhet t’i këshillojë zyrtarët partiakë se nuk ndihmohet ai nëse shahet Amerika

Shkruan: ANALISTI - Nue Oroshi

Fillimisht dua të them se këshillat e miqve tanë amerikanë nuk janë ndërhyrje në politikën e brendshme të Republikës së Kosovës. Natyrisht, forcat politike në Republikën e Kosovës e bëjnë interpretimin e tyre të ndryshëm.

Lexoni edhe:

Qeveria e re do të përballet me një presion të madh nga administrata e presidentit Trump

-Opozita, në këtë rast, e lavdëron Grenellin, ndërsa pozita e kritikon. Sa i përket sulmeve ndaj zyrtarëve të lartë amerikanë, duhet të kemi kujdes, e sidomos në këtë rast Kurti duhet t’i këshillojë deputetët dhe zyrtarët partiakë se ai nuk ndihmohet nëse shahet Amerika apo ndonjë zyrtar i lartë amerikan.

Ekziston edhe një arsye pse Grenell e kritikon Kurtin. Arsyeja është se, para zgjedhjeve në Amerikë, Kurti kishte shprehur një mbështetje të madhe politike për Kamala Harris. Në këtë rast, ai ka bërë një gabim në rolin e kryeministrit. Ndërsa, në cilësinë e kryetarit të VV-së, ka qenë e natyrshme që një forcë e majtë politike të përkrahë një forcë tjetër të majtë politike.

Pavarësisht se kush do ta fitojë shumicën pas zgjedhjeve të 9 shkurtit 2025 në Republikën e Kosovës, administrata amerikane dhe presidenti Trump do të bashkëpunojnë me qeverinë e re të dalë nga zgjedhjet demokratike.

Një gjë duhet ta kemi të qartë: marrëdhëniet mes Republikës së Kosovës dhe Amerikës duhet të jenë të përhershme, pavarësisht se kush është në pushtet.

Shkrimet në këtë rubrikë nuk shprehin qëndrimet e gazetës "Kosova Sot Online".