Pranimi me konsensus politik i propozimit franko- gjerman, çelësi i vetëm për ndalimin e ndikimit në rajon nga ana e Rusisë

Shkruan: ANALISTI - Gani Qarri

Duke qenë se humbjen e Milo Gjykanoviçit dhe fitoren e kandidatit të krahut pro serb, Jakov Milatoviq në zgjedhjet e fundit presidenciale në Mal të Zi, analistët politik, veçanërisht në raport me Kosovën, e shohin si proces mjaft negativ, që mund të qojë në shtrirjen dhe forcimin edhe më të gjerë të ndikimit ruso- serb në Ballkanin Perëndimor, ku Kosova mbetet e vetme në kundërshtimin e ekspansionit ultra-sllav, partitë opozitare në Kosovë, duhet të mendojnë mirë, se në mulli të kujt, po qojnë ujë, me veprimet e tyre oportuniste, qasjen aspak reale dhe sjelljet, tërësisht jo konformë zhvillimeve politike në rajon.

-Tanimë po shihet fare qartë se, me kundërshtimin e planit franko gjerman për marrëveshjen e dakorduar mes Kosovës dhe Serbisë, mjerisht një pjesë e opozitës së inkriminuar të Kosovës, është duke e luajtur publikisht lojën e djallit dhe me vetëdije të plotë, po i bënë shërbimin më të mirë të mundshëm politikës ekspansioniste të Rusisë për rritjen e ndikimit të saj, jo vetëm në Serbi por edhe në shtet fqinje, si në Mal të Zi, që deri më tani ishte bastion i fortë kundër ekspansionizmit serbo rus në këtë pjesë të Ballkanit Perëndimor! Madje vet përfaqësuesi special i Bashkimit Evropian për dialogun Mirosllav Lajçak, ka deklaruar se pranimi i planit evropian do të ngushtonte shumë, hapësirën e Rusisë në Ballkan, pra pranimi i propozimit të BE-së për normalizimin e marrëdhënieve ndërmjet Kosovës dhe Serbisë do të zvogëlojë hapësirën që Rusia të ndërhyjë në zhvillimin e ngjarjeve dhe të krijojë kaos në rajon. Ky deklarim kaq i qartë dhe i hapur i z. Lojcak, është edhe një argument, mese i mjaftueshëm se-pse edhe opozita kosovare, medoemos duhet ti bashkohet Qeverisë së Kosovës, në mënyrë që propozimi evropian i cili shkon hap pas hapi drejtë njohjes së plotë, të pranohet një zëri dhe të mos rrezikohet me dështim, përmes lojës të "kinse" refuzimit, nga ana e saj.

Lexoni edhe:

Të veprohet me kujdes në zbatimin e marrëveshjes me Serbinë, Asociacioni vetëm pa kompetenca të shtetit

Për aq më tepër, Lajçak, në konferencën online “Evropa dhe Rusia në Frontin Ballkanik”, tha se pas sulmit të Rusisë ndaj Ukrainës, stabilizimi i Ballkanit Perëndimor është më i rëndësishëm se kurrë më parë, për BE-në.

Emisari evropian, mes tjerash, vlerësoi se marrëdhëniet ndërmjet Kosovës dhe Serbisë janë problem kyç për të gjithë rajonin, i cili bllokon normalizimin e Ballkanit Perëndimor dhe lirinë e lëvizjes, prandaj BE dhe SHBA janë angazhuar kaq fuqishëm për ndërmjetësim dhe normalizim të raporteve mes këtyre dy vendeve, kështu që pranimi i marrëveshjes do të ishte një mesazh pozitiv për të gjithë rajonin”,theksoi Lajçak. Siç dihet kryeministri i Kosovës Albin Kurti dhe presidenti serb Aleksandër Vuçiq janë pajtuar se nuk ka nevojë për bisedime të reja, sa i takon tekstit të marrëveshjes dhe tani duhet të përcaktohet rendi i hapave të ardhshëm, afatet dhe kush çfarë duhet të implementojë nga secila palë. "Kemi krijuar anekse në lidhje me zbatimin e marrëveshjes dhe pas bisedimeve në Prishtinë e Beograd, është duke u përgatitur një version i ri i aneksit, i cili do të diskutohet të shtunën e ardhshme në Ohër"sqaroi Lajçaku.

Nga ana tjetër Komisionari për Zgjerim i Bashkimit Evropian, Oliver Varhelyi, ka deklaruar se zgjerimi i BE-së me Ballkanin Perëndimor është prioritet i Bashkimit Evropian, por humbjen e Milo Gjukanoviçit në zgjedhjet e fundit presidenciale në Mal të Zi dhe fitoren e kandidatit të krahut pro serb, Jakov Milatoviq, edhe analistët politik, e shohin si proces mjaft negativ, që mund të qojë në shtrirjen dhe forcimin edhe më të gjerë të ndikimit ruso- serb në rajonin e Ballkanit Perëndimor, ku Kosova mbetet e vetme në kundërshtimin e turrit që ka marrë, ekspansioni ultra-sllav.

Shkrimet në këtë rubrikë nuk shprehin qëndrimet e gazetës "Kosova Sot Online".