Një mesazh mirënjohjeje për Presidentin e posa zgjedhur Amerikan, z. Donald Trump!

(Donald J. Trump The Trump Organization

725 Fifth Avenue

New York, NY 10022

United States)

-I dashur President i Amerikës z. Donald Trump,

Shkruan: Lekë Mrijaj

Urimet më të sinqerta për zgjedhjen tuaj si President i Shteteve të Bashkuara të Amerikës! Ky është një moment historik jo vetëm për vendin tuaj, por për mbarë botën e lirë. Ne shqiptarët, në Shqipëri, Kosovë dhe viset shqiptare, ndjejmë krenari dhe mirënjohje të thellë ndaj Amerikës, vendit që përfaqëson lirinë dhe demokracinë më të lartë në botë.

Lexoni edhe:

Me rëndësi primare për Kosovën, forcimi i marrëdhënieve me administratën shtetërore dhe ushtarake të SHBA-ve

Mbështetja e Amerikës për shqiptarët ka një histori të gjatë e të thellë, që nis me Presidentin Woodrow Wilson. Me vizionin dhe përkushtimin e tij, ai mposhti përpjekjet për të copëtuar trojet shqiptare pas Luftës së Parë Botërore. Presidenti Wilson u bë simbol i fuqisë dhe guximit për mbrojtjen e të drejtave të kombeve të vogla si Shqipëria, duke vendosur themelet e një miqësie që vazhdon përjetësisht.

Më pas, kjo mbështetje e Amerikës u theksua sërish në kohët më të vështira për ne në Kosovë, veçanërisht gjatë luftës për liri. Presidenti George H. W. Bush, me vendosmërinë e tij, dërgoi një mesazh të qartë kundër dhunës dhe represionit në Ballkan, duke shprehur mbështetje për popullin shqiptar të Kosovës. Në fillim të viteve ’90, SHBA e bëri të qartë me paralajmërimin e Kërshëndellave se Kosova ishte vijë e kuqe për Amerikën.

Kjo mbështetje u përforcua më tej nga Presidenti Bill Clinton, i cili, frymëzuar nga Nënë Tereza, tha: “Nënë Tereza ishte ajo që më bëri ta dua kombin shqiptar.” Ai bashkoi komunitetin ndërkombëtar për të ndalur krimet ndaj shqiptarëve dhe për të siguruar një të ardhme të lirë për Kosovën. Me ndërhyrjen historike të NATO-s, e udhëhequr nga SHBA, ëndrra e Kosovës së pavarur u bë realitet.

Pas tij, Presidenti George W. Bush shpalli njohjen e pavarësisë së Kosovës, një akt që konfirmoi miqësinë e sinqertë mes popullit amerikan dhe shqiptarëve në Kosovë, Shqipëri dhe diasporë. Këto momente janë për ne më shumë se akte politike; ato janë dëshmi të një miqësie të vërtetë dhe përkushtimi për lirinë dhe të drejtat njerëzore.

Ndaj, i dashur President Trump, shqiptarët në të gjitha trojet e tyre dhe në diasporë shpresojnë se, nën udhëheqjen tuaj, Shtetet e Bashkuara do të vijojnë angazhimin për paqe, stabilitet dhe zhvillim në Ballkanin Perëndimor. Besojmë se SHBA, me ju në krye, do të qëndrojë gjithmonë pranë nesh, duke forcuar marrëdhëniet dhe mbështetur përparimin demokratik dhe integrimin tonë euro-atlantik.

President Trump, urojmë që gjatë mandatit tuaj të mbani gjallë këtë miqësi të çmuar dhe të ndihmoni që vlerat tona të përbashkëta të pasqyrohen në një të ardhme të ndritur për popujt tanë. Zoti ju dhëntë sukses dhe forcë për të udhëhequr me vizion dhe drejtësi!

Me mirënjohje të thellë dhe përkushtim të përhershëm,
Shqiptarët e Kosovës, Shqipërisë dhe diasporës.

Republika e Kosovës, Klinë, 7 nëntor 2024

Shkrimet në këtë rubrikë nuk shprehin qëndrimet e gazetës "Kosova Sot Online".