Marrëveshja midis Kosovës, Shqipërisë dhe Kroacisë, mund të ketë pasoja negative

Shkruan: ANALISTI-Florim Zeqa

Marrëveshja trepalëshe e nënshkruar midis Kosovës, Shqipërisë dhe Kroacisë mund të ndikojë në marrëdhëniet e këtyre vendeve me shtetet anëtare të NATO-s, si dhe me Bashkimin Evropian. Për shkak se kjo është një marrëveshje mes të pabarabartëve dhe pa partneritet me aleatin kryesor, që në këtë rast është NATO!

Lexoni edhe:

Fatkeqësi që një pjesë e shqiptarëve po punojnë kundër kombit

-Përderisa Shqipëria dhe Kroacia janë anëtare të NATO-s, Kosova nuk ndodhet gjëkundi në agjendën e anëtarësimit në Aleancën më të madhe ushtarake në botë. Pavarësisht vullnetit të mirë për bashkëpunim trepalësh në fushën e sigurisë rajonale, mungesa e përfaqësuesve të NATO-s në këtë marrëveshje e bën atë të pazbatueshme në rrafshin praktik.

Prandaj, kjo marrëveshje pa përfshirjen e NATO-s mund të ketë pasojat negative për vendin tonë, megjithëse Kosova ka prezencën më të madhe të trupave të NATO-s në rajon.

Kjo i bie, sikur “çeragjiu” t’i bëjë llogaritë pa “hangjiun”!

Pa NATO-n në këtë marrëveshje, të gjitha ujditë bien poshtë! Kur dihet fakti se Aleanca është faktori kyç i sigurisë dhe stabilitetit në rajonin e Ballkanit!

Kosova duhet të jetë tepër e kujdesshme në aventurat e diplomacisë ushtarake. Ne nuk e kemi komoditetin të hedhim hapa të parakohshëm diplomatikë pa koordinim me NATO-n dhe SHBA-të, pasi nuk jemi faktorë që i determinojmë zhvillimet politike dhe as ato ushtarake në rajonin tonë, e lërë më të anashkalojmë faktorin kryesor të sigurisë sonë fizike dhe territoriale.

NATO nuk kishte asnjë rol në procesin e konsultimit në lidhje me Deklaratën për Forcimin e Bashkëpunimit Mbrojtës, e cila u nënshkrua pak ditë më parë mes Kosovës, Shqipërisë dhe Kroacisë!

Kjo flet shumë për ngutinë dhe papjekurinë tonë politike!

Deklarata e marrëveshjes trepalëshe midis Kosovës, Shqipërisë dhe Kroacisë pa prezencën e NATO-s, më shumë e shpërfaq dobësimin e besimit në Aleancë sesa arritjen e një marrëveshjeje të dobishme për vendin tonë!

Për fund, dëshiroj t’ju rikujtoj politikanëve tanë dhe opinionit publik, se deri më tani, të gjitha veprimet e pakoordinuara me NATO-n dhe SHBA-të na kanë kushtuar me humbje të besimit me partnerët tanë.

Shkrimet në këtë rubrikë nuk shprehin qëndrimet e gazetës "Kosova Sot Online".