Rënia e LDK-së në 13% po përdoret sot si një kamxhik për të goditur Abdixhikun

Shkruan: ANALISTI-Zef Prenka

Në diskursin politik të Kosovës, ku zhurma shpesh vlen më shumë se argumenti, figura e Lumir Abdixhikut është shndërruar në një tabelë qitjeje për një lloj të ri agresiviteti, që buron sa nga kundërshtarët ideologjikë, aq edhe nga llogoret e fshehura brenda vetë LDK-së. Akuzat se ai është i pavlerë apo jo i denjë për të udhëhequr subjektin më të vjetër në vend, nuk janë asgjë tjetër veçse broçkulla politike të ambalazhuara si analizë. Ky është një skenar i mirëpërgatitur nga ata që karrigen e kryetarit e shohin si pronë, e jo si përgjegjësi. Duke e etiketuar moderimin e tij si dobësi, këta zëra tentojnë të fshehin faktin se Abdixhiku po përpiqet të instalojë një kulturë evropiane në një ambient që ende lëngon nga mentaliteti i intrigave të korridoreve.

Lexoni edhe:

Qarri: Kur një njeri si Abdixhiku katapultohet në krye të LDK-së pa qenë as anëtar mund të konsiderohet edhe si pengmarrje

-Rënia e LDK-së në 13% po përdoret sot si një kamxhik për të goditur kryetarin aktual, por kjo shifër nuk është produkt i punës së tij; ajo është fatura e vonesave historike dhe gabimeve të njerëzve që sot e kritikojnë pas shpine. Është e qartë se ekziston një sabotim i organizuar, ku ata që nuk e votuan subjektin e tyre vetëm për të dëmtuar liderin, po dëshmojnë se interesi i tyre personal peshon më shumë se fati i LDK-së si parti shtetformuese. Ata që e quajnë “të butë”, në fakt e kanë frikë qasjen e tij intelektuale, sepse në një debat idesh ata mbeten të zhveshur nga çdo argument. Abdixhiku përfaqëson atë shtresë të mesme dhe atë rini të shkolluar që nuk kërkon sherr, por zgjidhje, dhe kjo duket se po i tmerron ata që politikën e shohin vetëm si mjet për dominim fizik e zhurmues.

Megjithatë, për të mbijetuar në këtë xhungël politike, Abdixhiku duhet të bëjë një kapërcim të domosdoshëm në mimikën e tij politike. Moderimi nuk duhet të jetë pasivitet. Ndaj atyre që “pështyjnë” mbi projektin e ri të LDK-së, përgjigjja duhet të jetë e prerë dhe pa ekuivok. Ai ka nevojë të shfaqë një autoritet të hekurt ndaj sabotatorëve të brendshëm, duke u treguar se koha kur partia mbahej peng për interesa klanore ka përfunduar. Nuk mund të ndërtosh një shtet modern me njerëz që punojnë me skenarë pas shpine. Abdixhiku është sot e vetmja barrierë mes një LDK-je që transformohet në një forcë moderne perëndimore dhe një LDK-je që rrezikon të mbetet thjesht një kujtim nostalgjik.

Në fund, lufta që po zhvillohet rreth Lumir Abdixhikut është lufta për identitetin e vetë Kosovës. A do të udhëhiqemi nga njerëz që dinë të ndërtojnë ura dhe të ofrojnë programe, apo do të biem pre e atyre që e duan pushtetin vetëm për të ushqyer egot e tyre? Ata që sot e shajnë Abdixhikun për “butësi”, në fakt po shajnë civilizimin politik. Është koha që kryetari i LDK-së ta kthejë këtë mirësjellje në një armë sulmi, duke i spastruar radhët nga ata që nuk e duan suksesin e partisë, por thjesht dështimin e liderit. Vetëm me një qëndrim të palëkundur dhe një mimikë që tregon vendosmëri, ai do të arrijë të dëshmojë se moderimi është forca më e madhe e një lideri të vërtetë.

Shkrimet në këtë rubrikë nuk shprehin qëndrimet e gazetës "Kosova Sot Online".