Deri më tani Dimal Basha është sjellë më shumë si altoparlant i Kurtit

Shkruan: ANALISTI-Zef Prenka

Nuk ka asnjë shenjë që kjo zgjedhje të jetë bërë për interesin e shtetit. Nëse do të ishte konsensus, ai do të bazohej në një marrëveshje të qartë mbi reformën zgjedhore, forcimin e parlamentit apo zhvillimet ekonomike. Por asgjë e tillë nuk është parë. Mbështetja e disa deputetëve të PDK-së është shpjegim i mjaftueshëm se kemi të bëjmë me një pazar politik, ku VV dhe PDK kanë vendosur të shkëmbejnë favore të heshtura, secila për llogarinë e vet.

-Nga e kaluara e tij politike nuk kemi asnjë precedent që Basha të ketë vepruar ndryshe nga vija e partisë. Deri më tani, ai është sjellë më shumë si altoparlant i Kurtit, duke përsëritur diskursin e tij dhe duke mos ndërtuar asnjë profil personal politik. Kjo do të thotë se pavarësia e Kuvendit është në rrezik serioz: Basha nuk ka gjasë të jetë figurë mbi-palëshe, por thjesht një servil që do të zbatojë urdhrat e Kurtit.

Kjo është pika ku dobësia e tij do të shfaqet më qartë. Kuvendi i Kosovës është institucioni më i politizuar dhe më i konfliktuar në vend. Atje nuk mjafton njohja teknike e rregullores ose eksperienca menaxheriale; kërkohet lidership, neutralitet dhe aftësi negociuese. Basha nuk ka treguar aftësi të tilla. Ai do të gjendet përballë tensioneve që nuk mund t’i menaxhojë, sepse nuk ka kulturë të dialogut ndërpartiak, por vetëm përvojën e të qenit i bindur ndaj liderit. Rezultati do të jetë një kryetar formal, jo një ndërmjetës i vërtetë.

Shkrimet në këtë rubrikë nuk shprehin qëndrimet e gazetës "Kosova Sot Online".