Është koha që Washingtoni t’ia bëjë haptazi me dije Serbisë se Kosova është shtet sovran

Shkruan: ANALISTI-Isuf Bajraktari

Amendamenti i senatorëve amerikanë Thom Tillis dhe Jeanne Shaheen, që kërkon njohje reciproke mes Kosovës dhe Serbisë dhe refuzon çdo ide për ndryshim kufijsh, është një sinjal i rëndësishëm për kthimin e vëmendjes amerikane te parimet mbi të cilat u ndërtua paqja në Ballkan. Por, përtej fjalëve, mbetet pyetja thelbësore: a do të ketë Amerika guximin ta zbatojë këtë parim me vendosmëri politike?

Lexoni edhe:

Serbia ka qenë sistematikisht kundër çdo forme të njohjes së pavarësisë së Kosovës

-Në dokument thuhet se dialogët strategjikë mes SHBA-së dhe dy vendeve do të zhvillohen vetëm pasi të vërehet “angazhim për zbatimin e Marrëveshjes së Ohrit”. Kjo formulë e vendos Kosovën në pozitë të pabarabartë, sepse Beogradi as nuk e njeh marrëveshjen, ndërsa Prishtina ndodhet nën trysni për ta zbatuar. Barazia në letër shndërrohet në pabarazi në praktikë.

Në thelb, kjo pasqyron logjikën e sotme gjeopolitike të Washingtonit: stabilitet para drejtësisë. Serbia trajtohet si faktor që duhet të mbahet nën ndikim perëndimor, ndërsa Kosova shihet si partner i sigurt që mund të “menaxhohet” me kërkesa për fleksibilitet. Por kjo qasje ka një kufi moral e politik: nuk mund të ketë stabilitet të qëndrueshëm duke relativizuar të drejtën e një shteti të pavarur.

SHBA-ja duhet të jetë më e qartë dhe më e guximshme. Është koha që Washingtoni t’ia bëjë haptazi me dije Serbisë se Kosova është shtet sovran dhe i pakthyeshëm, dhe se çdo marrëveshje në Ballkan duhet të ndërtohet mbi këtë realitet, jo përreth tij. Çdo përpjekje për “ekuilibra artificiale” e dëmton vetë besueshmërinë e politikës amerikane në rajon.

Amendamenti Tillis–Shaheen është një hap në drejtimin e duhur, por ai duhet të shoqërohet me vendimmarrje politike të guximshme: me presion të barabartë mbi të dyja palët, me sanksione të qarta ndaj obstruksionit të Serbisë, dhe me përfshirje strategjike të Kosovës si partner i plotë, jo kushtëzor.

Nëse SHBA dëshiron ta ruajë rolin e saj si garant të paqes dhe drejtësisë në Ballkan, ajo duhet të rikthehet te parimi që e bëri aleate të popullit të Kosovës në vitin 1999: se liria nuk është kompromis dhe shtetësia nuk negociohet.

Shkrimet në këtë rubrikë nuk shprehin qëndrimet e gazetës "Kosova Sot Online".